Bob Mannes•2 weeks ago Wéi kënne mer am Réckbléck op dëse Summer eppes ustellen fir eis op déi potentiell nächst Dréchenten an Extrem Hëtzt virzebereeden? Wéi kënne mir gläichzäiteg der heemescher Déieren- a Planzewelt méi Plaz ginn, Reewaasser besser notzen an eis Uertschaft esou gestallten dass méiglechst wéineg Hëtzt Inselen optauchen?Wéi kënne mir eis Gemeng esou gestalten dass se fir hier Bierger e liewenswäerten, naturnoen an agreaablen Liewensraum ubidde?Follgend Proposen solle weisen dass all dës froen net getrennt vuneneen musse behandelt ginn. Eng naturno Gemeng kann zur selwechter Zäit d’Biodiversitéit ënnerstëtzen, Reewaasser zeréckhalen, d’Ëmgéigend am Summer ofkillen an d’Liewensqualitéit vun de Bierger verbesseren.Kuerz gesot: d’Natur soll an eiser Gemeng net nëmmen eng dekorativ Roll, mee och en aktiven Deel vun eiser Infrastruktur ginn.Amplaz Reewaasser esou séier wéi méiglech ofzeleeden, an ëffentlech Fläche all Joers op en neits beplanzen an ze ënnerhalen, kenne mir der Natur op ausgewielte Plazen erëm mei Raum ginn, oder existéierenden Raum anescht gestallten an natierlech Prozesser fir eis schaffen loossen.Et geet em 8 Punkten déi verschidden Elementer ervirhiewen an Preziséieren:1) Méi Natur an eiser Gemeng: Changementer an senger Heemescht sinn net ëmmer einfach, an de leschten Joren huet sech eis Gemeng vill verännert an dach ass se selwecht bliwwen. Et sinn vill néi Residencen an Haiser fir nei Matbierger entstanen, et koumen eng Réi Changementer a punkto Gebailechkeeten fir eis Kanner a Schüler dobäi, Brécken a Stroossen goufen sanéiert, Geschäfter si komm a gaange. Mer Mënschen hunn eis weider ausgebreet an eis d’Natur esou gestallt dass se eis gefält. An bestëmmte Fäll zum gudden, wéi am Park Ouerbett mat dem klengen renaturéierten Deel vun der Käler Baach, am aneren zum manner gudden duerch Versigelung vun groussen Plazen duerch nei Gebaier, Infrastrukturen a Stroossen. Dobäi gouf Natur a kleng Backen an a kleng Gréngflächen verdrängt.Propose ass der Natur e stéck ënnert d’Äerm ze gräifen, dat musse keng grouss Naturschutzgebidder sinn. Schonn e puer Quadratmeter kënnen als klengt Biotop fir Insekten, Villercher an aner Déieren déngen. Méiglech Elementer sinn zum Beispill:
Wëllblummewisen
Heemesch Stauden a Sträich
Sand-Flächen a Sandarien
Doudholz
Dréchemaueren a Steekéip
Kleng Weieren oder Temporär Fiichtflächen
Naturno Hecken
Blieder vu Beem als Koup leie loossen iwwert de Wanter
Asw
Esou entstinn vill kleng Natur-Inselen an der Gemeng, déi wann een se net ze vill isoléiert vuneneen erstellt, Korridore fir Insekten a Déiere erméiglechen. Besonnesch interessant kann et ginn wann dës Flächen an der Zesummenaarbecht mat Bierger a Gemeng duerch notzen vu Gäert, Parken, Wisen, Stroossebeem, der Kälbaach an anere Gréngfläche entstinn.2) Méi heemesch a méijäreg PlanzenOp ville Plazen duecht Gemeng ginn all Joer nei Zierplanze gesat, déi zwar schéin ausgesinn, awer keen ökologeschen Notzen hunn fir Déierewelt, zudeem ginn se duerch Joer e puer mol ersat well se saisonal geplanzt gi.Hei kéint d’Gemeng no an no méi op méijäreg, heemesch Planze setzen.Heemesch Planze sinn un eis klimatesch Bedéngungen ugepasst a kënnen der lokaler Déierewelt Narung, Schutz a Liewensraum bidden.Gläichzäiteg kënne méijäreg Beplanzungen op laang Siicht manner Aarbecht a manner reegelméissegen Neikaf bedeiten.Dat heescht net, datt vun haut op muer all bestoend Beplanzung ersat soll ginn. D'Ëmstellung kann no an no geschéien, zum Beispill wann eng bestoend Planz verschwënnt oder eng Fläch souwisou nei gestalt gëtt.Dat selwecht gëllt fir privat Gäert.Keen soll gezwonge ginn, eng bestoend Heck oder eng Planz erauszerappen, un där een hänkt. Vill méi wichteg ass et, Informatiounen an Alternativen unzebidden.Wann zum Beispill eng Heck no an no ofstierft oder eng nei Heck geplangt gëtt, kann op heemesch oder ekologesch méi wäertvoll Alternativen higewise ginn.3) Entsiegelen amplaz versigelen:Vill Plazen an eiser Gemeng bestinn nach ëmmer majoritär aus Bëton, Makadamm oder Pavésteng. Optesch geséit et propper aus, ökologesch sinn et awer Wüsten, am Summer ass et en Rezept fir Hetzt-Inselen zumools a Verbindung mat geparkten Autoen, an bei Reen ass et eng onduerchlässeg Schicht a Richtung Kanal. Dofir soll bei zukünftegen Projeten an och op bestoend Plazen iwwerpréift ginn, ob een des Flächen entsieglen kann.Wann des de Fall ass, soll mat den bestoenden Technologien wéi waasserduerchlässeg Pavésteng, strategeschen Gréngflächen oder souguer Waasserretentiounsbecken mat oder ouni Beréngung iwwerluecht gi.4) Waasser an der Gemeng halenLaang dréche Perioden an héich Temperaturen stellen net nëmmen de Mensch, mee och d’Natur, d’Beem an och eis Waasserversuergung virun nei Erausfuerderungen.Mer kennen net drop waarden bis eppes am nationalen Kader decidéiert gëtt fir unzefänken iwwert eis lokal a regional Erausfuerderungen nozedenken, de Moment ass elo, an net erreecht wann et ze spéit ass. Staark Nidderschléi a kuerzer Zäit bréngen grouss Quantitéite Waasser mat sech. An der Zäit konnten déi sech an de Felder a Wisen usammelen a lues versickeren, sou wéi een dëst nach op eenzelnen Plazen a Richtung Näerzeng geséit. Haut stinn op dëse Plazen Haiser mat Pompelen am Keller Richtung Kanal. Domat ass kuerzfristeg den Awunner gehollef, laangfristeg bleiwen awer rout Zuelen um Waasser-Bilan stoen. D’Zil soll dofir sinn, Reewaasser esou laang wéi méiglech do ze halen, wou et fält.Natierlech ëmmer do, wou dat technesch a sécher méiglech ass.5) Reewaasser vun ëffentlechen Gebaier notzenUschléissend un de Punkt vu virdrun, wier et eng Approche Diecher vun ëffentleche Gebaier als Sammelfläch fir Reewaasser ze benotzen. D’Gemeng kéint dofir ënnersichen, d’Reewaasser bei Schoulen, Sportshalen, Kulturgebaier, Gemengenatelieren, der Schongfabrick an aneren ëffentleche Gebaier anescht ze benotzen ewéi et ant Kanalisatioun ze leeden. Do wou et méiglech ass, kéint Waasser amplaz:
An Zisternen oder Reentonne gesammelt ginn
Fir d’Bewässerung vun ëffentleche Gréngflächen oder jonk Beem agesat ginn
A Versickerungsmulden geleet gi, déi entweder begréngt sinn oder net
Sou kann d’Waasser méi lues an de Buedem andrénge a gegeebenenfalls ant Grondwaasser fléissen, esou wéi et dat soss och gemaach huet viru der Versigelung oder et benotzt een wou et applikabel ass, fir der Vegetatioun ze hëllefen. 6) Vun der Kanalisatioun zur “Schwampgemeng”Laangfristeg kéint eis Gemeng sech dem Prinzip vun enger Schwampstad oder méi prezis enger Schwampgemeng orientéieren.D’Grondiddie ass wéi virdrun schonn erwäänt dat Waasser dat eiser Gemeng zur Verfügung steet iwwert de Reen och bei eis an der Gemeng bleift an net weider geleet gëtt.Dat kann e puer positiv Effekter gläichzäiteg hunn
Kanalisatioun gëtt bei staarkem Reen manner séier belaascht an doduerch gëtt méi wéit och Kläranlage entlaascht
Vegetatioun huet méi Waasser zur Verfügung an eis Beem hunn och Méiglechkeet aus méi déiwen Schichten Waasser erop ze huelen
A Prinzipiell suergen begréngt Versickerungsmulden als Géigegewiicht vun Hëtzt-Inselen.
Dofir kéint bei Zukünftege a bestoenden Stroossen, Parkingen a Gebailechkeeten d’Fro vun der Waasserretentioun systematesch matgeduecht ginn. 7) D’Kälbaach als gréng a blo AchsMat der Kälbaach huet eis Gemeng eng besonnesch Méiglechkeet, déi aneren Gemengen net zousteet.Si kéint nach méi staark als ekologesch Achs duerch d’Gemeng geduecht ginn, zumools well se net nëmmen laanscht bestoend Gréngflächen leeft, mee och well e Groussdeel vun de Schoulen direkt niewendrun ass. An dësem Fall kéint iwwerpréift ginn ob een
D’Ufer méi naturno gestalten a gegeebenefalls ausbreeden kéint
Wou et därzäit Plaze gëtt wou sech invasiv Aarten duerchgesat hunn an déi verdrängen mat eenheemeschen Aarten
Wou kleng Liewensraim fir Waasser- an Uferdéieren entstoe kënnen
Wéi Reewaasser mei natierlech an de lokale Waasserkreeslaf integréiert ka ginn
Ob a wéi ee Quellewaasser kéint aleeden, dat bis ewell och ant Kanalisatioun fléisst
Konkret soll dës Propose net alles op d’Kopp geheien, et soll drëms goen, déi Méiglechkeeten auszenotzen déi engem zur Verfügung stinn. All Punkt vun der Propose huet séin eegenen Wäert an net all mussen ëmgesat gi.Et ass och ervirzehiewen wéi sech e renaturéierten Deel op d’Ëmfeld auswierkt mat dem Beispill vun der Kälbaach am Park Ouerbett.8) D’Bierger mat abannenDen wichtegsten Deel vun allem ass dëse Punkt. Eng Gemeng ass näischt ouni hier Bierger an ouni hiert Averständnis an Engagement. Dofir sollen dës Proposen am Aklang mat de Bierger geschéien an och fir Diskussiounen suergen mat aneren Solutiounen oder Approchen. Engersäits well privat Gäert zesummen eng grouss Fläch vun eiser Uertschaft ausmaachen an dofir e weidere wichtegen Deel vun dësem Konzept kenne sinn. Anerersäits well näischt soll iwwert Käpp vun de Bierger decidéiert gi, zumools wann et em d’Gestaltung vun hirer Heemescht geet. D’Participatioun soll dobäi fräiwëlleg sinn an mat beispillsweisen Informatiouns-Owenter mat oder ouni praktesch Atelieren iwwert Sujeten wéi
D’Gestaltung vun engem Naturgaart
Heemesch Planzen, Hecken, Stauden a Wëllblumme
Liewensraim fir Insekten, Villercher, Reptilien an Amphibien
Ëmgang mat invasiven Aarten an wéi een se bekämpft (Tigermécke, Jap. Hornissen, Flieder, asw)
Waasserretentioun am Gaart iwwert Zisternen (mat den verbonnenen staatlechen Subsiden), Reentonnen, Reegäert a Versickerungsmulden
Dobäi muss keen aus sengem Gaart eng Wëllwiss maachen, och e klengen naturnoen Eck kann hëllefen, oder halt näischt, et soll keen gezwongen ginn säin Gaart ëmzegestalten.Wann iwwert d’Jore och just e puer Bierger selwer matmaachen, kënnen dës kleng Fläche sech zesumme mat de Gemengeflächen zu engem Netz vu Liewensraim entwéckelen. Wat bréngt dat eiser Gemeng:Méi Biodiversitéit, duerch heemesch Planzen déi och der heemescher Déierewelt zegutt kommen.Méi Waasserretentioun, duerch verschidden Infrastrukturen fir Waasser net fort ze leeden.Méi Ofkillung am Summer, Beem a Vegetatioun gekoppelt u méi Waasser suergen fir Ofkillung.Méi Liewensqualitéit, duerch attraktiv gestallten Plazen an Treffpunkten, ouni den Alldagsstress an dem villen Verkéier. Méi Natur fir Kanner, fir um Schoulwee am direkten Kontakt mat der heemescher Natur ze sinn.Méiglech Erspuernisser op laang Siicht, naturno Flächen bedeiten net automatesch dass keng Ënnerhaltsaarbechten méi néideg sinn. Eng méijäreg Beplanzung kann awer op laang Siicht manner intensiv Ënnerhalt verlaangen ewéi Flächen, déi all Joer nei beplanzt musse ginn.Virbildfunktioun, mer sinn am Minett enk verbonnen duerch eis Geschicht an eis Kultur, dëst soll sech och erëmspigelen an eisem Ëmgang mat der Natur an ma eise Ressourcen. Dëst kann als Beispill ugesinn ginn fir eenzel Ëmsetzungen an aneren Gemengen ze kopéieren oder gegeebenefalls zu enger Kooperatioun féieren.Wéi kéint een ufänken?Dëse Projet muss net bedeiten, dass déi ganz Gemeng op eemol ëmgebaut gëtt. Et kéint een mat Pilotprojeten ufänken, an eng oder zwou Fläche bestëmme fir verschidden Iddien ze testen. An sech dono d’Resultater ukucken an déi néideg Froen stellen, ob et eppes bruecht huet, wei Natur reagéiert huet, wéi de Bierger domat ëmgeet a baséierend dovun de Projet no an no ausbauen op aner Plazen an der Gemeng.Budget:Vill Moossname kënnen och mat héije Käschte verbonne sinn. Deementspriechend kann een de Projet an dräi Budgetskategorien andeelen, jee nodeem wéi eng finanziell, technesch a rechtlech Méiglechkeete bestinn. Dobäi spillen ënner anerem staatlech Hëllefen a Subsiden, rechtlech Contrainten an déi néideg Récksprooch mat den zoustännegen Administratiounen a Ministèren eng Roll.Besonnesch déi proposéiert Zisterne kënne mat méi héije Käschte verbonne sinn, well jee no Standuert Buedemaarbechten, technesch Installatiounen an den Asaz vu spezialiséierte Firme néideg sinn. Aner Moossnamen, wéi d'Planze vun heemesche Beem a Stauden, d'Schafe vu Wëllblummewisen oder méi klenge Reegäert, kënne dogéint mat däitlech manner finanziellem an techneschem Opwand ëmgesat ginn vun den eegene Gemengen Ekippen.Wann een sech an enger éischter Phas op dës méi einfach a käschtegënschteg Moossname konzentréiert, kéint de Projet follgendermoossen opgebaut ginn:Basis-Variant: (Em 40.000-45.000€)
Heemesch an ekologesch wäertvoll Planzen asetzen an invasiv Aarten op ausgewielte Gemengeflächen konsequent besäitegen/zeréckdrängen
Heemesch Beem planzen
Wëllblumme Wisen a Biodiversitéitsinselen mat méijärege Stauden uleeën
éischt Reegäert a kleng Versickerungsfläche schafen
Informatiounsowender a praktesch Atelieren fir d’Bierger organiséieren
Referenz-Variant: (Em 70.000€)
Méi grouss oder zousätzlech Fläche begréngen
Bedeitend Entsigelungsmoossnamen op ausgewielte Gemengeflächen duerchféieren
Reewaasser Tonnen oder méi grouss Späicherméiglechkeeten/Zisternen, jee no Gebai installéieren
Zousätzlech Reegäert a Versickerungsmulden schafen
d'Unzuel u Beem, Biodiversitéitsinselen a Wëllblummewisen erhéijen
Erweidert-Variant: (Em 90.000-120.000€) (Méiglech wann de kommunale Budget duerch staatlech Subsiden oder aner finanziell Hëllefe verstäerkt ka ginn)
méi groussflächeg Entsigelung vu versigelte Gemengeflächen, beispillsweis op Parkingen, eenzele Parkplazen, Plazen oder Trëppelweeër
méi grouss Reewaasserretentiouns- a Versickerungsanlagen
méi grouss Zisternen oder aner Späichersystemer bei ëffentleche Gebaier
eng däitlech Erweiderung vum Reseau u Beem, Reegäert a Biodiversitéitsflächen
d'Abanne vun der Kälbaach an de Projet duerch fachlech an technesch gepréifte Moossnamen*
d'Ënnersichung, ob proppert Reen- oder Quellewaasser, dat momentan ofgeleet gëtt, op ausgewielte Plazen erëm an e méi natierleche Waasserkreeslaf integréiert ka ginn.*
*D'Ëmsetzung vu gréisseren hydrologesche Moossname soll a Récksprooch mat den zoustännege staatlechen Instanzen, besonnesch der Administration de la gestion de l'eau, an no enger technescher Evaluatioun geschéien.Käschten optiméierenOnofhängeg vun der gewielter Variant kéint d'Gemeng duerch eng koordinéiert Beschafen vu gréissere Quantitéiten u Beem, Stauden, Som a weiderem Material probéieren, méi avantagéis Präisser ze kréien fir Bierger déi participéiere wëllen.Dobäi kéint, wou méiglech, mat regionale Fournisseure geschafft an op heemesch respektiv ekologesch wäertvoll Planzen aus der passender Géigend opgepasst ginn.Gläichzäiteg sollen déi verfügbar staatlech Subsiden a finanziell Hëllefen virun der definitiver Planung an dem Ufank vun den Aarbechten gepréift ginn. Doduerch kéint et méiglech sinn, mat engem kommunale Budget vu ronn 70.000 € e Projet ëmzesetzen, deem säi reelle Gesamtwäert däitlech méi héich läit.